🏠 أين يوجد السيرفر؟ (On-Premise vs Cloud)
“هل السيرفر اللي بيشغل المواقع والبرامج الكبيرة موجود في الشركة نفسها؟ ولا على الإنترنت؟
الحقيقة إن فيه طريقتين رئيسيتين لتشغيل السيرفر، وده اللي هنعرفه دلوقتي.”:
- (On-Premise) محلي) = السيرفر فعليًا موجود جوه الشركة.
- (Cloud ) سحابي = السيرفر مش عندك، لكنه في مركز بيانات تابع لشركة تانية، وإنت بتوصله عن بُعد.
. السيرفر المحلي (On-Premise)
- بيكون موجود فعلاً في مقر الشركة أو المؤسسة.
- الشركة بتشتري السيرفر، وتركّبه، وتديره بنفسها.
💡 المميزات:
- عندك تحكم كامل في كل حاجة (البيانات، النظام، الأمان).
- مناسب للشركات اللي عندها متطلبات خاصة أو أنظمة داخلية حساسة.
⚠️ العيوب:
- محتاج تكلفة كبيرة في البداية (شراء الأجهزة + غرفة سيرفرات + كهربا + تبريد).
- لازم يكون فيه فريق IT قوي يديره.
- أي عطل في الكهرباء أو الأجهزة = توقف الخدمة.
🎯 تشبيه بسيط:
زي إنك تشتري عربية وتمتلكها بالكامل، بس لازم تصرف عليها صيانة وبنزين وتبقى مسئول عنها من الألف للياء.
☁️ السيرفر السحابي (Cloud Server)
- السيرفر فعليًا مش عندك، لكن في مركز بيانات تابع لشركة زي Amazon (AWS)، Microsoft Azure، أو Google Cloud.
- إنت بتستأجر مساحة أو قدرة معينة، وتستخدمها زي ما تحب.
💡 المميزات:
- مفيش مصاريف تركيب أو صيانة.
- تقدر تزود أو تقلل المساحة والمعالجة وقت ما تحب.
- الخدمة شغالة 24 ساعة بضمان من الشركة المزودة.
⚠️ العيوب:
- البيانات مش عندك فعليًا (موجودة في مكان خارجي).
- محتاج إنترنت قوي علشان تتعامل معاه.
- في بعض الحالات، الاشتراكات الشهرية ممكن تكون مكلفة لو الاستخدام كبير جدًا.
🎯 تشبيه بسيط:
زي إنك تأجر عربية من شركة تأجير، تستخدمها وقت ما تحتاج،
مش مسئول عن صيانتها، لكن العربية مش ملكك فعلاً.
🔄 مقارنة سريعة
|
العنصر |
السيرفر المحلي |
السيرفر السحابي |
| الملكية | ملكك بالكامل | إيجار |
| الصيانة | على حسابك | على الشركة المزودة |
| التكلفة الأولية | مرتفعة | قليلة |
| المرونة | محدودة | عالية جدًا |
| الأمان | حسب إدارة الشركة | حسب سياسات المزود |
| الوصول من الخارج | صعب أحيانًا | سهل من أي مكان |
💬 طيب في النهاية اختار ازي ؟؟؟
“الاختيار بين السيرفر المحلي والسحابي بيعتمد على حجم شغلك واحتياجاتك.
لو عندك نظام داخلي ومعلومات حساسة جدًا، المحلي ممكن يكون هو الأفضل.
لكن لو بتدور على مرونة وسرعة وتكلفة أقل في البداية، فالسحابة هي المستقبل.
خليني أوضحها أكتر:
لو إنت داخل على مشروع ضخم أو بتبني شركة وكيان كبير، ومعاك الإمكانيات المادية الكافية إنك تشتري الأجهزة وتعمل السيرفر داخل الشركة،
هنا الاختيار المنطقي هو السيرفر المحلي.
لأنك كده بتزود من أصول شركتك، وبتبني بنية تكنولوجية قوية،
وكل البيانات وقواعد المعلومات موجودة عندك في مقر الشركة.
حتى لو الإنترنت قطع، السيرفر شغال والدنيا ماشية معاك تمام.
أما لو المكان جديد ولسه في بدايته والإمكانيات محدودة،
لكن تقدر توفّر إنترنت قوي باشتراك ثابت،
في الحالة دي السيرفر السحابي هو الاختيار الأفضل.
لأن تكلفته بسيطة في الأول، ومع الوقت لما المشروع يكبر وتبدأ تحتاج تحكم أكبر وخصوصية أعلى،
ساعتها تقدر تنقل تدريجيًا لفكرة السيرفر المحلي.